Saħħaħna Pajjiżna…Biex INT Tgħix Aħjar

Il-Proġetti

'Fuq skala nazzjonali, il-pajjiż issaħħaħ f’diversi modi matul dawn l-aħħar erba’ snin. Il-kwalità tal-ħajja tjiebet għal kulħadd, kemm b’riżultat ta’ proġetti kapitali tal-Gvern kif ukoll b’riżultat ta’ proġetti kapitali b’investiment qawwi mis-settur privat.’ Dan ħabbru l-Viċi Prim Ministru, Dr Lawrence Gonzi waqt konferenza stampa dwar il-ħidma tal-Gvern f’dawn l-aħħar erba’ snin biex jitkattru l-proġetti. Il-konferenza stampa kienet indirizzata wkoll

mill-Ministru għar-Riżorsi u l-Infrastruttura, Francis Zammit Dimech.

Proġetti ta’ Tisbiħ

Numru ta’ lokalitajiet raw titjib fl-ambjent b’riżultat ta’ proġetti ta’ tisbiħ. Dan diġà seħħ f’ Tas-Sliema, bil-proġett ta’ tisbiħ tal-promenade, kif ukoll f’San Ġiljan, fejn tlestew l-ewwel tliet fażijiet tal-proġett ta’ tisbiħ li kienu jinvolvu xogħol strutturali estensiv. Sar ukoll xogħol ta’ platforms fil-baħar li fuqhom inbnew belvederes ġodda.

Xogħol ieħor twettaq f’Birżebbuġa, f’ Marsaxlokk u f’Wied il-Għajn, il-Bajja ta’ San Tumas, il-Floriana u l-Mellieħa. Il-Gvern impenja ruħu għal dawn il-proġetti kollha sabiex il-Maltin jgħixu kwalità ta’ ħajja ogħla f’ambjent isbaħ. Fl-aħħar erba’ snin, il-Gvern investa ’l fuq minn Lm4 miljun fid-diversi proġetti ta’ tisbiħ.

Il-proġett għar-riabilitazzjoni tal-belt Valletta kien jinkludi restawr fil-Konkatidral ta’ San Ġwann, l-installazjoni ta’ sistema ta’ dwal fi Triq ir-Repubblika, restawr ta’ affreski ta’ Paladini u D’Aleccio fil-Palazz il-Belt u pavimentar ta’ toroq.

Twettaq ukoll restawr fil-Berġa ta’ l-Italja u l-Berġa tal-Baviera. Fil-Floriana, l-Imdina, Bormla, l-Isla, u l-Birgu tkompliet ukoll ħidma ta’ restawr u riabilitazzjoni ta’ bini storiku, sabiex jitħares il-wirt storiku u tingħata dehra ġdida lill-ibliet fortifikati tagħna.

Sar xogħol estensiv ta’ restawr fuq bini storiku madwar Malta u Għawdex. Permezz tal-Unit tar-Restawr, twettqu 70 proġett ta’ restawr filwaqt li hemm 30 proġett ieħor li qed jitwettaq u 20 proġett f’ diversi stadji ta’ ippjanar. Għall-proġetti ta’ restawr u riabilitazzjoni, ġew investiti aktar minn Lm8 miljun. Fost l-oħrajn ġew rrestawrati l-Palazz ta’ Verdala fil-Buskett u n-niċċa ta’ San Pawl fis-Saqqajja, ir-Rabat. Ġie ppreparat ukoll tender għal security fence ġdid biex jitħarsu t-tempji preistoriċi ta’ l-Imnajdra. 

Parks u Konservazzjoni tal-Pajsaġġ

Twaqqfet sezzjoni bir-responsabbiltà prinċipali li tiżviluppa u timmaniġġja l-Parks nazzjonali u reġjonali kif ukoll tieħu ħsieb xogħol ġenerali ta’ tindif, tisbiħ u ħarsien fil-pajsaġġ u l-kampanja ta’pajjiżna.

Il-Gvern inkoraġġixxa numru ta’ proġetti kbar b’involviment ta’ investiment qawwi mis-settur privat. Il-Proġett tal-Kottonera baqa’ għaddej bir-ritmu li qabad fejn wara li fetaħ il-Casinò di Venezia f’palazz irrestawrat, issa qed isir xogħol ta’ bini ta’ appartamenti u stabbilimenti kummerċjali. F’dawn il-jiem kien iffirmat ftehim bejn il-Casinò di Venezia u l-Port Cottonera Limited għall-akkwist ta’ l-art mill-Casinò di Venezia biex tinbena lukanda Five Star fix-xatt tal-Birgu. Qed isir ukoll restawr u riabilitazzjoni ta’ bini storiku, twassil ta’ servizzi u xogħlijiet ta’ tiswija tal-mollijiet mill-Gvern. Fix-xhur li ġejjin se tinbena l-yacht marina.

Il-proġett ta’ Manoel Island u l-Ponta ta’ Tigne` miexi b’ritmu mgħaġġel. Wara li sar ħafna xogħol ta’ skavar f’Tigne’ biex jinbena carpark u jgħaddu s-servizzi, issa beda x-xogħol propju tal-bini. Fil-Ponta ta’ Tigne’ se jinbnew aktar minn 400 post residenzjali, ħwienet, stabbilimenti ta’ l-ikel u uffiċini. Se jkun hemm ukoll faċilitajiet sportivi u parkeġġ taħt l-art għal kważi 2,000 vettura.

Beda jitwettaq xogħol vast ta’ restawr f’Manoel Island, fejn se jinbnew 356 post ta’ akkomodazzjoni f’forma ta’ villaġġ. Se jkun hemm parks u ġonna u se jkunu żviluppati aħjar ix-xtut. Kemm il-Forti Manoel kif ukoll il-Ponta ta’ Tigne’ se jkunu aċċessibbli għal kulħadd. Tqiegħdu żewġ pontoons f’ Manoel Island fejn qed jirmiġġjaw 100 yacht ; numru li mistenni jitla’ għal 260 irmiġġ fix-xhur li ġejjin.

Fix-xatt tal-Belt inbeda proġett li jikkonsisti fl-iżvilupp ta’ Cruise Liner Passenger Terminal u International Sea Passenger Terminal u r-restawr u l-iżvilupp mill-ġdid tal-bini storiku li hemm fuq is-sit, bħal Pinto Stores, Forni Stores, u l-Power Station il-Qadima. Diġà nbena l-blokk alternattiv għar-residenti u l-ħwienet involuti f’dan il-proġett filwaqt li beda x-xogħol fuq il-bini ta’ triq ġdida li se twassal mill-Marsa għall-belt Valletta u li se tgħaddi wara l-imħazen Pinto u Forni. 

Dawn il-tliet proġetti kbar, li bejniethom jinvolvu investiment ta’ madwar Lm160 miljun, se joħolqu mijiet ta’ impjiegi iżda fuq kollox se jkomplu jtejbu l-kwalità tal-ħajja tal-Maltin u jagħtu kontribut qawwi għar-riġenerazzjoni ta’ l-inħawi fejn jinsabu.

Il-proġett ta’ Portomaso f’ San Ġiljan, jinkludi hotel, stabbilimenti kummerċjali, appartamenti, u faċilitajiet ta’ parking. Dan kollu diġà ħoloq diversi opportunitajiet ta’ xogħol f’oqsma differenti. 

‘Permezz ta’ dawn il-proġetti kollha, il-Gvern mhux biss qed isebbaħ pajjiżna u jagħtih xejra aktar moderna, iżda qed jistimula attività ekonomika u jkattar opportunitajiet ta’ impjiegi’, ikkonkluda l-Viċi Prim Ministru.