Saħħaħna Pajjiżna…Biex INT Tgħix Aħjar

Biex il-Familja Tiegħek Tgħix Aħjar

"Il-familja hija l-eżempju ewlieni ta’ l-impenn tal-Gvern biex insaħħu lil Malta u lil dak kollu li huwa Malti: f’kelmtejn, Insaħħu Pajjiżna," qal il-Ministru Gonzi. "Dan l-impenn sħiħ wassal biex, b’mod reali u konkret ikun hawn kwalita’ ta’ ħajja aħjar, ‘biex int tgħix aħjar’."

Il-konferenza ta’ l-aħbarijiet kienet indirizzata wkoll mill-Ministru ta’ l-Edukazzjoni, Louis Galea, il-Ministru għas-Servizzi Ekonomici, Josef Bonnici, il-Ministru għas-Saħħa, Louis Deguara u s-Segretarji Parlamentari, Jesmond Mugliett, u George Ħyzler.

Matul dawn l-aħħar erba’ snin, il-Gvern bil-ħidma tiegħu rnexxilu jaħdem biex inħoloq xogħol ġdid għal fuq minn-5000 persuna permezz ta’ 185 proġett tal-Korporazzjoni Maltija għall-Iżvilupp. Il-qagħad niżel mil-livell ta’ erba’ snin ilu. Biex ngħinu lill-membri tal-familja li jkunu qed ifittxu xogħol ġdid jew iridu jitgħallmu xi ħiliet ġodda l-ETC fil-Budget li għadda, ingħatat Lm1 miljun aktar sabiex tkun tista’ tiżviluppa programmi specjalizzati ta’ taħriġ.

Ix-xogħol m’għandux itellef lil dak li jkun milli jaqdi d-dmirijiet tiegħu fil-familja. Fl-istess waqt il-Gvern huwa determinat li jsaħħaħ il-patecipazzjoni tan-nisa fid-dinja tax-xogħol. Dan kollu ridna nagħtuh is-saħħa tal-liġi. Minħabba f’hekk tnedew l-liġijiet dwar l-impjieg u r-relazzjonijiet industrijali u dik dwar l-ugwaljanza bejn in-nisa u l-irġiel li permezz taghhom ġew imdaħħla miżuri ġodda bħall-parental leave, protezzjoni għall-ħaddiema part-time, siegħat ta’ xogħol mnaqqsa, leave għal-raġunijiet urġenti, protezzjoni għal-ħaddiema nisa waqt it-tqala, protezzjoni għall-ħaddiema żgħażagħ u protezzjoni kontra l-fastidju sesswali u l-diskriminazzjoni fuq il-post tax-xogħol. Dawn il-miżuri ġew wkoll imsaħħa permezz ta’ regolamenti ġodda dwar is-saħħa u s-sigurta’ fuq il-post tax-xogħol.

Familji għaddejjin minn diffikultajiet illum jistgħu jirrikorru għand l-aġenziji ‘Appoġġ’ u Sedqa. F’dawn l-aħħar xhur l-Appoġġ żiedet l-impenn tagħħa favur il-ħarsien għat-tfal u l-familji li jkunu għaddejin minn żminijiet diffiċli inkluż il-vjolenza domestika u l-abbuż mid-droga. Bdejna nipprovdu għajnuna finanzjarja lill-familji li jiffosterjaw lil xi tfal u lit-tfal li jisabu f’istituzzjoni residenzjali.

Jinsab għaddej titjib kontinwu fil-qasam tad-djar u ta’ l-akkomodazzjoni soċjali permezz ta’ sussidji u għotjiet għall-irranġar tad-djar residenzjali. Għal ħafna familji, u b’mod partikulari għal persuni b’diżabilita’ u għal l-anzjani, l-istallazzjoni ta’ liftijiet, tassew tfisser qabża sostanzjali fil-kwalita’ ta’ ħajja tagħhhm ta’ kuljum. Matul dawn l-erba’ snin ġew mibnija 900 unit għall-bejgħ sussidjat mill-Awtorita’ tad-Djar, filwaqt li x-xogħol fuq 300 unit oħra magħmula apposta biex jaqdu r-realtajiet socjali ta’ llum ser jitlesta fis-sena li ġejja. Numru ta’ proġetti mportanti għat-tneħħija ta’ slums fl’Imsida, Birkirkara u Floriana ġew mibdija. Ma jistax jintesa x-xogħol kbir li qed isir fid-day care centres għall-anzjani kif ukoll fir-residenza San Vincenz de Paule u Dar għall-Anzjani gewwa Bormla.

Għall-familji s-saħħa tiġi l-ewwel. Il-Gvern hu mpenjat li jipprovdi servizzi tas-saħħa ta’ l-ogħla kwalità kemm għal-lum kif ukoll għall-ġejjieni. Biex jassigura dan , il-Gvern sena wara l-oħra żied in-nefqa fis-settur tas-saħħa. Din is-sena in-nefqa f’dan is-settur se tkun ta’ Lm92miljun, b’ Lm17miljun għall-mediċini.

Permezz ta’ aktar awtonomija fl-isptarijiet il-pazjenti qed jingħataw trattament aktar malajr u effettiv. Aktar ma jgħaddi ż-żmien il-kura qed issir aktar personaliżżata.

Minkejja l-bini ta’ l-isptar Mater Dei, il-Gvern baqa’ għaddej fuq l-immodernizzar ta’ San Luqa u b’xiri ta’ appparat mediku mill-aktar modern li għandu jittieħed fl-isptar il-ġdid. Fost dawn insibu l-Magnetic Resonance Imaging (MRI), twaqqif ta’ Angiosuite, Coronary Intensive Care Unit (CICU) u Cardiac Catħetorisation Laboratory. Qegħdin isiru operazzjonijiet ta’ keyhole surgery, fuq ir-retina ta’ l-għajn u fuq il-glandola tal pituitary li qabel kienu jsiru barra minn Malta.

Ġew eliminati il-waiting lists biex pazjenti jibdew il-kura fl-isptar Boffa u ġew modernizzati diversi swali. Fl-isptar Monte Carmeli sar xogħol estensiv ta’ modernizzar ta’ diversi swali. Ġew introdotti ix-sheltered workshops fejn pazjenti jagħmlu xogħol bi ħlas li jservi ta’ terapija billi jrodd lura d-dinjità lill-pazjenti u jwittilhom it-triq għal meta jerġgħu lura fil-komunità.

Uliedna jenħtieġu edukazzjoni tajba u bażzi soda biex jimxu l quddiem u jkomplu jtejbu l-kwalita’ tal-ħajja tagħhom. Sabiex jkunu jistgħu jirċievu din il-preparazzjioni, il-Gvern investa madwar Lm 19 miljun fuq immoderniżżar u bini ta’skejjel f’dawn l-aħħar tliett snin, b’ nefqa ta’ Lm 3 miljun din is-sena. Tul dan is-sajf, sar xogħol estensiv ta’ refurbishment fuq 40 skola.

Twaqqfet il-Fondazzjoni għall-Iskejjel ta’ Għada biex tistudja l-bżonnijiet ta’ l-iskejjel tal-istat u l-Gvern issa kkommetta li jinvesti madwar Lm 60 miljun biex l-iskejjel ta’ l-istat kollha ikunu ta’ livell meħtieg skond il-Kurrikulu, b’mod li t-tagħlim jista jingħata b’mod aktar interessanti u li jolqot il-ħtiġijiet ta’ żmienna u tal-futur.

Wettaqna riforma ta’ l-edukazzjoni mill-qiegħ meta fassalna flimkien ma’ l-esperti u l-għalliema Kurrikulu Nazzjonali. Issa aktar minn qatt qabel it-tfal tagħna jitgħallmu dak li l-aktar jista’ jassigurhom li jlaħħqu ma’ l-isfidi tal-preżent u tal-futur.

Sa minn eta’ zgħira, tfal Maltin qed jingħataw l-opportunita’ li jitgħallmu kif juzaw tajjeb it-teknoloġija tal-kompjuter. Fil-livell tal-primarja, issa hemm kompjuter għal kull seba’ studenti u laptop computer għal kull għalliem. Tħejjew computer labs f’diversi skejjel sekondarji. Ħamsa u disgħin fil-mija (95% ) ta’ l-istudenti li jattendu skola sekondarja għandhom aċċess għall-internet fl-istess skejjel.

Aktar minn 90 kors qed jiġu provduti fis-sitt istituti tal-Kullegg Malti ta’ l-Arti, Xjenza u Teknologija (MCAST). Illum fil-kulleġġ hemm jistudjaw madwar 1,600 student u studenta, u din is-sena, ser jidħlu madwar 1300 student ieħor. Illum il-familji għandhom opportunita’ li jqattaw il-ħin liberu tagħhom ‘il bogħod mill-periklu, f’kumplessi kbar sportivi bħal dak fl-Universita’. Bħalissa, għaddej xogħol fuq il kumpless sportiv ta’ Bormla.

Il-familji huma wkoll konsumaturi, u għalhekk l-interessi ta’ dawn il-konsumaturi ġew ukoll imħarsa u mtejba. Il-familji Maltin illum għandom għazla wiesgħa ta’ prodotti bi prezzijiet kompettivi, b’riżultat ta’ kompetizzjoni fis-suq. Il-Ligi tal-Kompetizzjoni Ġusta kienet emendata biex tiggarantixxi suq ħieles u b’regoli ġusti. Ġew introdotti Att dwar is-Sigurezza tal-Prodott u Att dwar is-Sigurezza ta’ l-Ikel, kif ukoll bosta liġijiet relatati mal-konsumatur, bħal dawk ta’ reklamar qarrieqi u responsabbilta’ għall-prodotti. Dawn huma maħsuba biex jiżguraw aktar protezzjoni wiegħsa għall-familji konsumaturi.

"Tul dawn l-aħħar erba’ snin, b’mod konkret u għaqli, tajna’ priorita’ kbira lill-familja, f’kull settur li jikkoncerna. Kull meta nsaħħu l-qafas tal-familja, mill-ewwel nkunu f’qagħda aħjar biex niffaccjaw il-futur, bl-opportunitajiet u l-isfidi li dan jista’ joffrilna," kkonkluda l-Vici Prim Ministru.