Il-Prim Ministru Lawrence Gonzi jiltaqa’ fl-ewwel laqgħa tiegħu ta' kull xahar mal-media

Prim Ministru

Bi ħsiebni nibda darba fix-xahar nagħmel dan it-tip ta’ Press Briefing. L-iskop huwa li nsemmi l-punti ewlenin li seħħew, li jidhirli huma ta’ ċertu importanza imbagħad il-ġurnalisti jkollhom l-opportunità li jagħmlu l-mistoqsijiet li jidhrilhom huma fuq kwalunkwe suġġett li jidhrilhom huma.

F’dawn l-ewwel għaxart ijiem li għaddew, inżammu żewg laqgħat tal-Kabinett. Fl-ewwel laqgħa s-suġġett kien esklussivament fuq il-kwistjoni tal-Presidenza u wara din il-laqgħa allura jiena stajt ngħaddi mill-ewwel għall-konsultazzjoni ma’ l-Oppożizzjoni, ħaġa li għamilt l-għada tal-laqgħa tal-Kabinett, jiġifieri l-Erbgħa wara nofs in-nhar. It-tieni laqgħa tal-Kabinett nzammet nhar it-Tnejn li għadda, fejn iddiskutejna l-operat tal-Kabinett kif ser jimxi minn issa ’l quddiem inkluż ukoll it-twaqqif tal-Cabinet Committees li jiena kont ħabbart fil-Press Conference li kont għamilt dak in-nhar stess. Iddiskutejna xi suġġetti oħrajn li f’dan l-istadju nista’ ma nidħolx fihom għaliex huma suġġetti li għad iridu aktar diskussjoni li għad iridu jsiru bil-laqgħa tal-Kabinett. Però effettivament kien hemm suġġetti ta’ ċerta importanza li ġew diskussi fil-laqgħa tal-Kabinett, illi però għalissa għadu kmieni wisq biex nagħti xi dettalji fuqhom. Li nista’ ngħid illi f’dik il-laqgħa tal-Kabinett però, iddiskutejna l-Cabinet Committees, id-dettalji tagħhom, kif ser joperaw, u l-funzjonament tal-Kabinett minn issa ’l quddiem.

Iddiskutejna wkoll f’dik il-laqgħa, u approvajna n-nomina taċ-Chairman il-ġdid tal-Malta Tourism Authority, li hija awtorità ta’ importanza kbira f’pajjiżna. Nista’ ngħid illi aċċettajt ir-riżenja taċ-Chairman li kien hemm qabel fl-Awtorità tat-Turiżmu, is-Sur John C. Grech. Is-Sur John C. Grech irrid ngħid illi qeda l-funzjoni tiegħu til il-perjodu ta’ żmien kemm dam jokkupa dik il-kariga b’mod korrett u integru però nqalgħu diffikultajiet fil-ġimgħat li għaddew illi effettivament kienu jirrikjedu illi tittieħed deċiżjoni ta’ bidla fiċ-Chairmanship. Irrikonoxxejt l-integrità u l-onestà tas-Sur Grech, però fhimt illi fiċ-ċirkostanzi kien importanti illi s-sur Grech jinbidel u jintgħażel Chairman ġdid bħalma tafu, u tħabbar pubblikament, intgħażel is-Sur Chris Grech.

Jien kelli laqgħa mas-Sur Chris Grech. In-nomina tas-Sur Grech saret għall-bqija ta’ żmien illi kien ikopri n-nomina tas-Sur John C. Grech, jiġifieri tmien xhur u għidtlu għandek tmien xhur biex inti tidħol fil-kwistjoni ta’ l-Awtorità u tagħmel ir-rakkomandazzjonijiet biex din l-Awtorità naturalment tkompli timxi ’l quddiem u tindirizza l-qasam tat-Turiżmu bil-priorità, għaliex kif spjegajt diġà, bil-prioritajiet li jiena kont indikajt l- qasam tat-Turiżmu għandu huma priorità għal dan il-Gvern. Huwa parti importanti mill-ekonomija ta’ pajjiżna u jiena irrid illi nara dik l-Awtorità tiffunzjona bl-aktar mod effiċjenti u tagħmel użu massimu ta’ riżorsi li l-Gvern diġà alloka li huma r-riżorsi sostanzjali.

Matul din il-ġimgħa wkoll, il-bieraħ fil-fatt, jiena kelli laqgħa mas-Segretarji Permanenti kollha li l-Gvern għandu.  L-iskop kien illi nispjega lis-Segretarji Permanenti kollha illi huma għandhom ir-rwol kruċjali fit-twettiq tal-programm tal-Gvern. Prioritajiet illi jiena indikajt bħala prioritajiet ta’ dan il-Gvern, għandhom ikunu l-prioritajiet tagħhom u li allura għandhom jiffukaw l-enerġija tagħhom biex jaraw li l-Ministeru u d-Dipartimenti kollha li huma taħt ir-responsabbiltà tagħhom, ikunu effettivi fix-xogħol tagħhom iffukati fuq il-prioritajiet li semmejna u partikolarment f’dak li għandu x’jaqsam mat-tnaqqis tal-burokrazija, mat-tnaqqis tal-ħela u ma’ eżerċizzju li jfittex li jogħli l-livell ta’ produttività u effiċjenza fil-qasam tas-settur pubbliku kollu kemm hu.

Saret laqgħa ukoll matul dawn l-aħħar għaxart ijiem li għaddew mal-WasteServ. Din hija l-kumpanija illi hija responsabbli għall-qasam ta’ l-implimentazzjoni tal-programmi kollha li aħna għandna għat-trattament ta’ l-iskart u l-kwistjoni tal-Magħtab, u l-kwistjoni ta’ l-Imnajdra. Jiena tlabt lil WasteServ biex jesploraw l-alternattivi kollha li aħna għandna quddiemna anki sa llum, jiġifieri dan ifisser li l-ewwelnett it-terminu ta’ żmien ta’ l-1 ta’ Mejju biex il-Magħtab jingħalaq. Dak it-terminu jrid jinżamm akkost ta’ kollox li l-Magħtab irid jingħalaq, u dan ser iseħħ fl-1 ta’ Mejju u l-Magħtab ma jibqax jintuża. It-tieni kienet ġiet identifikata soluzzjoni temporanja għal-landfill temporanju u dan kien illi jinħoloq spazju ta’ storage ġewwa l-Magħtab stess fejn l-iskart ikun jista’ jinżamm għal perijodu ta’ żmien sakemm jiġi żviluppat is-sit fejn ikun jista’ jsir il-Landfill. U dak il-proċess ser isir ukoll.

Jien inkarigajt lil WasteServ biex malajr kemm jista’ jkun jesploraw l-alternattivi l-oħrajn, jekk jeżistu alternattivi oħrajn, biex naraw jekk għandniex nibqgħu mad-deċiżjoni illi kienet ittieħdet dwar il-Engineered Landfill, it-Temporary Engineered Landfill ta’ l-Imnajdra, jew inkella jekk hemm alternattivi viabbli illi jippermettulna illi aħna nimxu skond l-obbligazzjonijiet li għandna biex insibu l-aħjar soluzzjonijiet għal pajjiżna. Spjegajtilhom illi jiena konxju tal-kontroversja illi teżisti u li l-pubbliku Malti qiegħed jifhem id-diffikultajiet illi għandna f’dan il-qasam. Jiena konxju ta’ l-issue illi għandna fl-inħawi ta’ l-Imnajdra għandna tempji illi rridu nieħdu ħsieb dak l-ambjent u nkunu ċerti illi fid-deċiżjonijiet li għandna nieħdu ma nagħmlux ħsara lejn l-affarijiet li huma wirt storiku, kulturali, arkeoloġiku ta’ pajjiżna. Però nifhem ukoll illi l-qasam ta’ l-ambjent huwa priorità assoluta. Priorità assoluta l-ewwelnett għall-kwalità tal-ħajja tagħna l-Maltin u tal-familji tagħna. It-tieni għaliex il-qasam ta’ l-ambjent huwa kruċjali anki biex it-turiżmu f’pajjiżna jkun jista’ jiżviluppa min-naħa tal-WasteServ. Hemm il-commitment illi dan l-eżerċizzju jsir malajr kemm jista’ jkun u jagħtuna indikazzjonijiet tar-riżultati illi huma jkunu waslu għalihom, f’dan il-perjodu ta’ tmien ġimgħat sakemm ikolli din l-indikazzjoni.

Matul dawn l-għaxart ijiem ukoll dħalna fil-qasam tal-finanzi. Ħa naraw x’inhi l-istampa tal-qasam tal-finanzi s’issa.  Qegħdin issa f’April. Jidher illi qegħdin on track jew kwazi on track ma’ dak li kien qed jiġi ipproġettat għal dawn l-ewwel erba’ xhur tas-sena. Naturalment irridu nibqgħu b’għajnejna mixħutin b’mod u b’attenzjoni partikolari fuq id-dħul u l-ħruġ tal-Gvern għaliex it-target għandu jkun illi sa l-aħħar tas-sena jkunu mixjin skond dak li ġie budgeted għal din is-sena. U qed ninsisti illi l-mira għandha tkun illi żgur nibqu ma’ dan il-budget u jekk jistu’ jkun intejbu fuq dak li konna pproġettajna.

Irrid ngħid ukoll illi sadanittant bejn illum u għada u pitgħada hemm laqgħa ta’ l-ECOFIN illi qed issir ġewwa l-Irlanda li għaliha qiegħed jattendi s-Segretarju Parlamentari Tonio Fenech f’dan il-Ministeru, fil-Ministeru tal-Finanzi. Suġġetti li ser ikunu qegħdin jiġu diskussi f’dawn il-jumejn illi ġejjin huma issues li għandhom x’jaqsmu mas-servizzi finanzjarji. Is-suġġett ser ikun l-armonizzazzjoni tar-regoli bejn l-Unjoni Ewropea u l-Amerika. Jidher li aħna hemmhekk qegħdin diġà in line però huwa suġġett illi ser jiġi diskuss. Din hija laqgħa informali ta’ l-ECOFIN. It-tieni suġġett huwa issues li għandhom x’jaqsmu ma’ standards internazzjonali ta’ l-accounting. Hawnhekk ukoll pajjiżna wkoll m’għandux diffikultajiet għaliex aħna diġà pajjiżna nimplimentaw dawn l-istandards internazzjonali ta’ l-accounting.

Ikun hemm diskussjoni wkoll fuq is-sitwazzjoni ekonomika ġenerali fid-dinja fejn jidher illi l-indikazzjonijiet f’dan l-istadju huma illi qed ikun hemm irkupru żgħir f’titjib tal-qagħda ekonomika, però ser ikun hemm din id-diskussjoni. Ser ikun hemm diskussjoni wkoll li tinteressana ħafna u ċioè dwar il-Financial Perspectives ta’ l-Unjoni Ewropea għal perijodu ta’ żmien minn 2007 sa l-2013. Dan is-suġġett jinteressana għaliex f’dik id-diskussjoni żgur tqum il-kwistjoni ta’ l-Island Regions u allura l-pożizzjoni ta’ Malta partikolarment, iċ-ċirkostanzi partikolari ta’ din il-ġżira tagħna minħabba d-densità tal-popolazzjoni tagħha u minħabba r-regola li teżisti fl-Unjoni Ewropea dwar kif tittratta iżoli li jkunu iżoli f’reġuni jew inkella iżola-ġżira li tkun bil-Belt Kapitali li tkun fuq dik il-ġżira. Din hija issue li tinteressana ħafna u issa naraw id-diskussjoni kif tiżviluppa waqt din il-laqgħa. Tony Abela, is-Segretarju Parlamentari wkoll fl-Uffiċċju tal-Prim Ministru qiegħed ukoll jattendi bħalissa laqgħa informali tal-Ministri tad-Difiża illi qed tinżamm fi Brussel.

Naħseb illi bħala punti ewlenin forsi dawk kienu l-aktar li nista’ ngħid f’dawn l-aħħar għaxart ijiem. Hemm affarijiet oħrajn illi mhux ser noqgħod nidħol fihom, però ser inħalli lilkom il-ġurnalisti fil-libertà li tistaqsu l-mistoqsijiet.