Is-Servizz Informazzjoni tal-Gvern:  jipprovdi lill-pubbliku informazzjoni dwar servizzi u attivitajiet tal-Gvern. Is-Servizz Informazzjoni tal-Gvern hu marbut li josserva l-livell ta’ kwalità ta’ servizzi skond kif stipulat fil-Quality Service Charter. Il-pubbliku jista’ jagħmel użu minn dan is-servizz billi jċempel fuq Freephone 153, jew jibgħat e-mail indirizzat info@gov.mt jew inkella permezz ta’ fax fuq 21 222696.  Kull min għandu aċċess għall-e-mail jista’ japplika għad-Direct Mailing Services mingħajr ħlas.  Dawn is-servizzi jinkludu tliet kategoriji ta’ avvizi meħudin mill-Gazzetta tal-Gvern ta’ Malta dwar Impjiegi fis-Settur tal-Gvern, Boroż ta’ Studju u sejħiet għal Tenders.  Servizzi oħra jinkludu Ritratti lill-Istampa u Stqarrijiet li jinħarġu mid-Dipartiment ta’ l-Informazzjoni, kif ukoll Djarju ta’ Avvenimenti.  L-informazzjoni tintbagħat  regolarment fl-email account tal-persuni abbonati.  Barra minnhekk informazzjoni tal-Gvern tiġi pubblikata fuq l-internet www.doi.gov.mt. L-Istqarrijiet jiġu aħħornati f’kull ġurnata tax-xogħol u l-Impjiegi mal-Gvern, il-Boroż ta’ Studju u s-sejħiet għal Tenders jiġu aġġornati dakinnhar stess li jidhru fil-Gazzetta tal-Gvern.   Is-Servizz Informazzjoni tal-Gvern jistieden lill-membri tal-pubbliku biex jekk ikollhom bżonn, jiġu personalment fl-Uffiċċju tal-Customer Care, 3 Misraħ Kastilja, Valletta, biex jiksbu informazzjoni jew jiġbru letteratura dwar servizzi u attivitajiet tal-Gvern. 

Avvenimenti:  Koordinazzjoni ta’ faċilitajiet provduti lill-media kif ukoll lill-pubbliku in generali waqt funzjonijiet statali, avvenimenti nazzjonali, żjajjar uffiċjali barra minn Malta mill-Presidenti u mill-Prim Ministru, kif ukoll Elezzjonijiet Ġenerali u tal-Kunsilli Lokali.  Organizzazzjoni tal-Padiljun Nazzjonali fil-Fiera Internazzjonali ta’ Malta. 

Relazzjonijiet mal-Media:  L-Istqarrijiet kollha maħruġa mid-Dipartiment ta’ l-Informazzjoni, flimkien ma' avviżi oħra u ritratti, jintbagħtu elettronikament kuljum lill-organizzazzjonijiet kollha tal-media lokali. Id-Dipartiment joffri wkoll faċilitajiet ta' akkreditazzjoni lill-membri tal-media kemm lokali kif ukoll lil ġurnalisti li jkunu qed iżuru Malta fuq xogħol.

PUBLISHING UNIT  

Pubblikazzjonijiet:  Jiġu ppreparati u ppubblikati l-Gazzetta tal-Gvern ta’ Malta, ir-rivista Pajjiżna u pubblikazzjonijiet oħra kemm dwar servizzi offruti mill-Gvern kif ukoll dwar suġġetti ta' interess ġenerali (Govt Gazette Subscription Form).

Servizz ta' Aħbarijiet:  Bulettini ta' aħbarijiet bil-Malti u bl-Ingliż, jintbagħtu kuljum lill-Missjonijiet Diplomatiċi barra minn Malta, Konsulati, stazzjonijiet etniċi u rappreżentanti tal-Banek Maltin fl-Awstralja u l-Kanada. Barra minnhekk, kull tliet ġimgħat, tintbagħat pubblikazzjoni elettronika bl-isem ta' Malta Update lill-Missjonijiet Diplomatici u Konsulati barra minn Malta. Din il-pubblikazzjoni regolarment tiġbor fiha djarju ta' attivitajiet li jkunu ġraw fit-tliet ġimgħat li jkunu għadhom kif għaddew, kif ukoll tagħrif dwar aspetti domestiċi, ekonomiċi u internazzjonali. 

DOI Website (http://www.doi.gov.mt):  Immaniġġjar, żvilupp u aġġornament regolari tas-sit kif ukoll tħaddim ta’ Servizz Elettroniku ta’ l-Ahbarijiet (Registration Form). 

Reġistru ta' l-Istampa:  Jinżamm u jiġi aġġornat kontinwament ir-Reġistru ta' l-Istampa skond kif jitlob l-Att dwar l-Istampa.

DOI SALES OFFICE

Arkivji ta' Ritratti:  L-arkivji fihom kollezzjoni kbira ta’ ritratti kemm kontemporanji kif ukoll antiki li jmorru lura fi żmien meta d-DOI kien kważi l-uniku sors minn fejn wieħed jista’ jiġbor informazzjoni. Wieħed jista' jara selezzjoni ta' ritratti arkivjati fid-DOI Photo Gallery. Ir-ritratti, li kopji tagħhom kollha jinsabu għall-bejgħ, jittrattaw varjetà wiesa'  ta' suġġetti bħal konferenzi internazzjonali, Żjajjar Statali, Ċelebrazzjonijiet Nazzjonali, wirt artna u aerial views ta' bliet u rħula Maltin (Order Form). 

Bejgħ ta' Pubblikazzjonijiet:  Fost il-Pubblikazzjonijiet li jinbiegħu mid-Dipartiment ta' l-Informazzjoni wieħed isib Pubblikazzjonijiet Uffiċjali tal-Gvern, il-Gazzetta tal-Gvern, id-Diskorsi tal-Budget, l-Estimi Finanzjarji u Economic Surveys, Abbozzi ta' Liġijiet imressqa fil-Parlament, Liġijiet, Avviżi Legali, Rapporti maħruġa mill-Uffiċċju Nazzjonali ta' l-Istatistika u oħrajn.

PHOTOGRAPHIC SERVICES