Miżura Temporanja għat-Twaqqif ta’ Ġarr ta’ numru ta’ Speċi minn Malta għal Għawdex

Fil-ġimgħat li għaddew, id-Dipartiment għas-Saħħa tal-Pjanti tal-Ministeru għall-Affarijiet Rurali u l-Ambjent identifika l-preżenza ta’ insett ġdid f’Malta, il-Bumunqar Aħmar tal-Palm, Rhynchophorus ferrugineus (Olivier). Dan l-insett jaffettwa negattivament ċerti speċi ta’ palm.

Wara li ġie aċċertat li dan l-insett għadu ma ġiex introdott f’Għawdex, il-Ministeru għal Għawdex, flimkien mal-Ministeru għall-Affarijiet Rurali u l-Ambjent qegħdin jieħdu miżura temporanja li twaqqaf il-ġarr ta’ numru ta’ speċi suxxettibbli għal dan l-insett bejn Malta u Għawdex.

L-ispeċi ta’ pjanti u siġar huma: Areca catechu, Arenga pinnata, Borassus flabellifer, Calamusmerillii, Caryota maxima, Caryota cumingii, Cocos nucifera,Corypha gebanga, Corypha elata, Elaeis guineensis, Livistona decipiens, Metroxylon sagu, Oreodoxa regia, Phoenix canariensis, Phoenix dactylifera, Phoenix theophrasti, Phoenix sylvestris, Sabal umbraculifera, Trachycarpus fortunei u Washingtonia spp.

Nhar il-Ġimgħa 16 ta’ Novembru 2007, fit-3.30pm, ser issir laqgħa ta’ informazzjoni fis-sala tal-Ministeru għal Għawdex, dwar l-impatt ta’ dan l-insett u l-miżuri li jistgħu jittieħdu kontrih. Il-pubbliku, speċjalment sidien ta’ garden centres, ġardinara, bdiewa u persuni oħra interessati huma mħeġġa li jattendu.

Aktar informazzjoni tista’ tinkiseb mid-Dipartiment għas-Saħħa tal-Pjanti (tel 23397223) jew mill-website ta’ l-istess dipartiment

 http://www.planthealth.gov.mt/Downloads/red_palm_weevil.pdf

Din il-miżura tibqa’ fis-seħħ sakemm tinħareġ notifika oħra f’dan is-sens mill-Ministeri konċernati.

 DOI – 09.11.2007