Jitnieda pjan ta’ azzjoni għat-tisħieħ tal-Moviment tal-Koperattivi f’Malta

Permezz ta’ kolloborazzjoni bejniethom, in-negozji li jagħmlu parti minn koperattiva qegħdin isibu bosta vantaġġi fl-attivita’ kummerċjali tagħhom.  Il-Gvern huwa mpenjat li jgħin aktar negozju jikkunsidraw il-vantaġġ li jingħaqdu f’koperattiva.  Il-koperattivi huma mod ieħor ta’ kif isir in-negozju u ser inkunu qegħdin naħdmu flimkien ma’ l-assoċjazzjonijiet tal-koperattivi biex flimkien intejjbu l-ħidma tal-koperattivi.”  Is-Segretarju Parlamentari għan-Negozji Żgħar u s-Self Employed, Edwin Vassallo, qal dan fit-tmiem ta’ laqgħa ta’ diskussjoni ma’ rappreżentanti ta’ koperattivi li fiha ġie diskuss pjan ta’ azzjoni għall-koperattivi. 

“Aktar kmieni din is-sena bħala Segretarjat Parlamentari għan-Negozji Żgħar u s-Self Employed organizzajna konferenza nazzjonali li għaliha ġew mistiedna rappreżentanti mill-koperattivi kollha.  Waqt il-konferenza sar SWOT analysis fuq il-koperattivi, u wara riċerka li saret fuq ir-riżultati li ħarġu minn din l-analiżi, illum qegħdin inniedu pjan ta’ azzjoni għall-koperattivi.  Minkejja l-perċezzjoni ta’ spiss żbaljata fost il-pubbliku in ġenerali, l-Moviment Koperattiv Malti m’huwiex dgħajjef, iżda jista’ jiftaħar b’ħafna punti ta’ forza li, jekk wieħed jaraf jisfruttahom tajjeb, jista’ jagħmel mill-Moviment forza ekonomika u soċjali qawwija ħafna kif ġara f’ħafna pajjiżi fl-Ewropa u madwar id-dinja.  Fil-fatt, l-istatistika fuq il-Moviment tal-Koperattivi turi li l-Moviment huwa b’saħħtu, varjat u dinamiku.  Il-moviment tal-Koperattivi waħdu ilaħħaq turnover annwali ta’ ‘il fuq minn Lm25 miljun (€58)” kompla s-Segretarju Parlamentari Edwin Vassallo.

Is-soċjetajiet koperattivi f’Malta ilhom jeżistu mis-sena 1947.  L-ewwel ma ġew iffurmati kienu koperattivi agrikoli u warajhom dawk tas-sajd.  Ilum f’Malta hawn 59 koperattiva li bejniethom imissu l-firxa kollha ta’ l-attivita’ ekonomika Maltija mill-biedja u sajd sas-servizzi finanzjarji.  Minkejja diffikultajiet kbar u żminijiet diffiċli, l-Moviment Koperattiv Malti baqa’ jissaħħaħ matul iż-żmien u huma ħafna dawk il-koperattivi li qegħdin jitmexxew b’suċċess kemm ekonomiku u kemm soċjali. 

L-Onor. Edwin Vassallo qal li “għalkemm il-koperattivi qegħdin jissaħħu, xorta waħda għad hemm punti li jinħtieġu attenzjoni, u dawk kollha li pparteċipaw fl-analiżi tal-koperattivi waqt il-konferenza kienu konxji ta’ dan.  Fil-fatt fir-rapport li ġie ppubblikat wara l-konferenza, hemm lista kompluta ta’ punti ta’ forza, kif ukoll sfidi u theddid, u opportunitajiet.  Fil-ġimgħat li għaddew, bħala Segretarjat ħdimna viċin tal-Moviment tal-Koperattivi biex ħejjejna pjan ta’ azzjoni.  Il-pjan ta’ azzjoni għandu 13-il punt li ser inkunu qegħdin naħdmu fuqhom.”

Il-punti li ġew identifikati bħala l-aktar importanti biex il-koperattivi jkunu jistgħu jaħdmu aħjar huma:

1.                  Riforma sabiex tintlaħaq is-sinerġija bżonnjuża bejn l-entitajiet legalment responsabbli mis-suċċess tal-Moviment tal-Koperattivi f’Malta jigifieri il-Membri tal-Bord, il-Fond tal-Koperattivi u l-Apex.

2.                  Flimkien ma’ l-Apex jiġu organizzati laqgħat biex niltaqgħu ma’ kull koperattiva u jsiru laqgħat ohra mal-managers tal-koperattivi.

3.                  Tingħata prijorita lil tibdil meħtieġ fil-liġi tal-koperattivi. Dan sabiex din tiġi aġġornata għaż-żminijiet tal-llum.

4.                  Ħidma sabiex fl-2007 10 koperattivi jkunu jistghu jippartecipaw fi proġetti iffinanzjati mill-Unjoni Ewropea li jgħinhom jakwistaw il-kuntatti u l-ħiliet meħtieġa biex ikabbru l-operat tan-negozju tagħhom barra minn Malta.

5.                  Ħidma li permezz tagħha il-koperattivi ikunu jistgħu jiġu mgħejjuna jibdew jesportaw il-prodotti u s-servizzi tagħhom barra minn Malta. Dan ser isir possibli permezz ta’ export houses u l-Malta Enterprise.

6.                  Nagħmlu direttorju tal-koperattivi li għandu jwassal biex il-koperattivi jkunu aktar kapaċi jaħdmu flimkien.

7.                  Issir diskussjoni ma’ koperattivi fis-servizzi professjonali li kapaċi jkunu ta’ servizz għall-koperattivi oħra.

8.                  Jiġi identifikat ir-rwol bejn l-APEX u l-Bord tal-Koperattivi dwar min jista’ jkun ‘point of reference’ għall-koperattivi li jista’ jkollhom problemi partikolari.

9.                  Nidentifikaw xi proċeduri li jistgħu jiġu ssimplifikati għall-koperattivi fl-użu tal-fondi ta’ l-Unjoni Ewropea.

10.              Isiru żjajjar għand koperattivi biex inkunu nistgħu nuru l-ħiliet u l-kapaċitajiet tal-koperattivi lill-pubbliku ġenerali biex ikun hemm aktar awareness dwar il-ħtiega tal-koperattivi.

11.              Isiru laqgħat ma’ setturi differenti ta’ self-employed f’żoni industrijali, bil-ħsieb li nħajjru sidien ta’ negozji fil-manifattura, bħalma huma mastrudaxxi, biex jaħsbu dwar il-possibilita’ li joħolqu ‘buying co-operative’.

12.              Ikun imfassal programm ta’ taħriġ għall-koperattivi flimkien mal-Apex.

13.              Il-Moviment tal-Koperattivi isiru parti integrali mill-Forum għall-Imprenditorja li jiġbor fih l-assoċjazzjonijiet tan-negozju. 

“L-għan tagħna hu li permezz ta’ din il-ħidma, aħna, flimkien ma’ l-organizazzjonijiet li jirrapreżentaw il-koperattivi, ser inkunu qegħdin ngħinu biex il-koperattivi jkomplu jsaħħu l-ħidma u l-pożizzjoni tagħhom.  Ser inkunu qegħdin norganizzaw attivitajiet biex inressqu l-koperattivi aktar qrib tan-negozji żgħar, kif ukoll l-organizazzjoni Scoops, li bħalissa hi rappreżentata f’numru ta’ skejjel primarji, ser tkun qiegħda testendi l-programm tagħha wkoll għal skejjel sekondarji u fl-Universita.  Permezz ta’ din il-ħidma ser naraw kif il-Moviment tal-Koperattivi jibqa’ jissaħħaħ biex joffri mudell ta’ negozju differenti,” temm is-Segretarju Parlamentari Edwin Vassallo.

DOI – 29.05.2007