L-Onor. Austin Gatt, Ministru għall-Investiment, Industrija u Teknoloġija ta’ l-Informazzjoni nieda servizz ieħor tal-Gvern Elettroniku. Permezz ta’ dan is-servizz, issa wieħed jista’ jidħol fis-servizzi tal-uffiċċju tad-Data Protection Commissioner.  

Teoretikament id-Data Protection Commissioner jaqa’ taħt il-Ministeru ghall-Investiment, Industrija u Teknoloġija ta’ l-Informazzjoni, iżda għall-effetti prattiċi kollha, dan hu uffiċju għal kollox awtonomu. Fil-fatt deċiżjonijiet tiegħu jridu jiġu kkontestati direttament fil-Qorti u l-Ministru m’għandu ebda kompetenza jew indħil f’dawn id-deċiżjonijiet. 

Il-Ministru Austin Gatt faħħar l-operat effiċjenti ta’ dan l-uffiċċju, li filwaqt li kellu l-potenzjal li jkun revenue generator għall-Gvern, seta’ kien ukoll mostru burokratiku.  

Huwa saħaq li m’hemmx dubju li x-xogħol tal-Kummissarju għall-Protezzjoni ta’ Data, is-sur Paul Mifsud Cremona u qablu tas-sur John Mamo, assigura li għal kull min jirrispetta l-privatezza tad-‘data’ ma nħoloqx xi ostaklu burokratiku għal min jopera kummerċjalment. Huwa fisser li dan l-uffiċju sab il-bilanċ bejn il-bżonn ta’ regolamentazzjoni biex tipproteġi liċ-ċittadini u l-ispazju biex is-settur kummerċjali jopera bl-anqas xkiel possibbli. 

Il-Ministru Austin Gatt qal li l-inizjattiva mnedija llum hija bbażata fuq l-impenn tal-Ministeru tiegħu u ta’ l-uffiċju tad-Data Protection Commissioner biex jiġi żviluppat mezz elettroniku għal dawn is-servizzi.  

Austin Gatt qal li hu pożittiv li bħal fl-okkażjoni tal-lum, wieħed jara l-eżempju pożittiv tal-leaders fis-servizz pubbliku li qed imexxu din il-bidla kulturali li għandna bżonn (bħal m’hi d-Data Protection Commission fost ħafna oħrajn). 

Tkellem ukoll id-Data Protection Commissioner, Paul Mifsud Cremona li għamel referenza għal ħidma tal-uffiċċju tiegħu. Huwa spjega li f’dawn is-sentejn l-Uffiċċju rċieva u rreġistra 9,100 notifika minn Kontrolluri tad-data (1,760 mingħajr il-ħlas ta’ Lm10). Huwa fakkar dan l-Uffiċċju huwa wkoll miftuħ għal tagħrif mitlub mill-pubbliku in ġenerali.  Fil-fatt sal-lum l-Uffiċċju rċieva 360 queries bil-miktub inkluż bl-e-mail, barra l-ħafna telefonati li jkunu riċevuti ta’ kuljum. 

Meta ċittadin iħoss li d-drittijiet tiegħu taħt il-liġi jkunu nkissru, dan jista’ jressaq ilment lil dan l-Uffiċċju.  L-ilmenti jkunu nvestigati u tingħata d-deċiżjoni formali tal-Kummissarju dwarhom.  Kull deċiżjoni tal-Kummissarju (li f’dan ir-rigward igawdi indipendenza assoluta minn kwalunkwe influwenza) tista’ tkun appellata fi Tribunal maħtur bil-liġi.  Fil-fatt kienu rċevuti u deċiżi 92, li minnhom wieħed kien appellat.   

Fil-biċċa l-kbira tagħhom dawn kienu dwar ksur ta’ kunfidenzjalita’, dritt ta’ aċċess, komunikazzjonijiet mhux mixtieqa (unsolicited) u żamma ta’ records.  Is-setturi li dwarhom saru l-ilmenti kienu jinkludu bank, sptar, forza dixxiplinata, kunsilli lokali u ‘credit referencing agencies’. 

.../...
 

DOI - 25.01.2006