Saħħaħna Pajjiżna…Biex INT Tgħix Aħjar

Impenn Serju Biex Għawdex u l-Għawdxin Jimxu 'l Quddiem

Qasam tas-Saħħa
F’dan il-qasam, il-Ministeru għal Għawdex jagħmel investiment kapitali ta’ madwar Lm110,000 fis-sena. Din hija nefqa ta’ aktar minn 35% aktar milli l-Gvern Laburista nefaq f’Għawdex fl-1997 f’dan is-settur.

Il-Ministeru ghal Ghawdex żied għadd ta’ servizzi u faċilitajiet li llum qiegħdin jingħataw mill-Isptar Ġenerali ta’ Għawdex. Servizzi ġodda jinkludu dawk tat-testijiet tas-smiegħ, acupuncture, testijiet tad-demm, konsulti newroloġiċi, ortodontiċi, oftalmiċi, u dawk offruti min-nutrition clinic. Faċilitajiet ġodda jinkludu r-Renal Unit, l-Isolation Unit u s-Central Sterile Supplies Department. B’hekk ittaffew t-tbatija u l-inkonvenjent għall-pazjenti Għawdxin peress li issa jistgħu jinqdew f’iktar servizzi tas-saħħa f’Għawdex stess.

Biex dan l-isptar jilqa’ aħjar lil kull min jiġi bżonnu, tkompla xogħol infrastrutturali estensiv kif ukoll tisbiħ u modernizzar tad-Dipartiment ta’ l-Emerġenza. Is-Swali Anzjani Nisa ingħataw attenzjoni partikolari u ġew ristrutturati sabiex meta jerġgħu jibdew jintużaw joffru akkomodazzjoni lil21 pazjenta aktar, fi kmamar attrezzati apposta għal nisa ta’ ċerta’ eta’ u fuq kollox ambjent arjuż u li jilqgħek. Ġie modernizzat ukoll wieħed mill-operating theatres. Sar ukoll xogħol estensiv ta’ titjib fi Swali ta’ l-Irġiel u tan-Nisa fejn fost l-oħrajn ġew installati sistemi ġodda ta’ l-arja kundizzjonata.

L-Edukazzjoni, il-Kultura u l-Isport
It-tfal u l-istudenti Għawdxin jixirqilhom l-aħjar ambjent possibbli biex jitgħallmu fih. Għalhekk intefqu Lm800,000 minn Settembru 1998 s’issa biex, kull fejn kien hemm bżonn fl-iskejjel, saret manutenzjoni, tisbiħ u modernizzar. Inbnew u ġew attrezzati seba’ laboratorji għat-tagħlim tax-Xjenzi u tal-Computers fl-iskola post-sekondarja ta’ Għawdex.

Sabiex studenti Għawdxin ikollhom preparazzjoni aħjar għad-dinja tax-xogħol f’Għawdex stess, infetaħ l-ewwel ċentru ta’ l-MCAST f’Għawdex li qed joffri 8 korsijiet, 4 minn liema qed jiġu offruti f’Għawdex għall-ewwel darba. L-Istitut għall-Istudji Turistiċi (ITS) introduċa wkoll kors full time u oħrajn part time sabiex isaħħaħ l-industrija tat-turiżmu f’Għawdex.

Għal dawk l-Għawdxin li jixtiequ jtejbu aktar il-livell ta’ l-edukazzjoni tagħhom, iċ-Ċentru ta’ l-Universita’ f’Għawdex kabbar u żied l-attivitajiet tiegħu. Illum, dan joffri numru ta’ korsijiet li jwasslu għal ċertifikat, diploma, baċellerat, u saħansitra għal Masters. Dawn il-korsijiet qed ikollhom attendenza tajba ħafna speċjalment għaliex jippermettu lill-Għawdxin li diġa’ jaħdmu jew jgħixu f’Għawdex biex isegwu korsijiet mingħajr l-iskariġġ u t-telf ta’ siegħat twal biex jagħmlu dan f’Tal-Qroqq. Fl-ewwel sena li beda joffri l-korsijiet, kienu jattendu madwar 40 student. Illum, 10 snin wara, dawn żdiedu għal madwar 250 student.

Il-Gvern kompla jieħu ħsieb li il-kultura u l-istorja ta’ Għawdex ikunu mogħtija l-attenzjoni li jixirqilhom. Fiċ-Ċittadella tkomplew ix-xogħlijiet ta’ restawr filwaqt li kienet imtejba s-sigurta’ fil-mużewijiet kollha tal-Gvern f’Għawdex. B’kollaborazzjoni ma l-assoċjazzjoni Wirt Għawdex qiegħed isir ir-restawr tat-Torri ta’ Mġarr ix-Xini. Saru wkoll diversi festivals fosthom il-Festival ta’ Kulturi ta’ Gżejjer Ewropej.

Fil-qasam ta’ l-isport saru xogħlijiet ta’ bini ta’ żewġ club houses fix-Xewkija u f’Kerċem u ta’ modernizzar u manutenzjoni fuq għadd ta’ faċilitajiet madwar Għawdex, fosthom fil-Kumpless Sportiv.

Infrastruttura
Il-Gvern kompla b’impenn serju u investa Lm750,000 fil-bini ta’ numru ta’ toroq arterjali u 47 triq oħra madwar Għawdex kollu. Il-Ministeru għal Għawdex bena wkoll madwar 11,000m² ta’ passaġġi fir-raba’ u madwar 2.5km ta’ ħitan tas-sejjieħ. Saru wkoll diversi water culverts sabiex jissolvew diversi problemi ta’ għarar speċjalment fi Triq Fortunato Mizzi, Victoria fejn sar investiment ta’ Lm90,000 sabiex issolviet din il-problema b’mod permanenti. Aktar minn Lm1 miljun intefqu fuq it-tkomplija tal-Master Plan tad-Drenaġġ b’xogħlijiet diversi madwar Għawdex kollu.

Il-Gvern ħa ħsieb li, f’kull qasam, familji Għawdxin ikollhom livell għoli ta’ servizzi. Għalhekk sar tisħiħ permezz ta’ submarine cable ġdid li jipprovdi provvista ta’ l-elettriku iktar stabbli u b’saħħitha, kif ukoll fil-qasam tat-telekomunikazzjoni permezz tat-tqegħid ta’ fibre optic cable ġdid li jilqa’ għaz-żieda fid-domanda fil-qasam ta’ l-informatika fil-preżent u fil-futur.

Sabiex itejjeb it-trasport bil-baħar bejn iż-żewġ gżejjer, il-Gvern ħa diversi miżuri, fosthom it-tnaqqis fin-nollijiet għall-Għawdxin. Il-Gvern għamel ukoll investiment ta’ Lm33 miljun sabiex il-Gozo Channel Company Ltd. issa għandha flotta ta’ 3 vapuri ġodda li huma wkoll akbar. Dan ifisser inqas stennija fi kjuwijiet u vjaġġ f’ambjent isbaħ u iktar modern, aktar sigurta’ u kumdita’.

Ix-xogħlijiet fil-port taċ-Ċirkewwa, li mal-mollijiet tiegħu issa jistgħu jittrakkaw il-vapuri kważi f’kull kundizzjoni ta’ temp, ifisser li l-vjaġġ bejn Malta u Għawdex ser ikun wieħed kontinwu. Ix-xogħol fil-port ta’ l-Imġarr ser itejjeb il-faċilitajiet offruti għall-passiġġieri f’Għawdex.

Ambjent, Kampanja, Agrikoltura u Sajd
Biex kulħadd igawdi minn ambjent aħjar u iżjed nadif, ittieħdet azzjoni biex għadd ta’ scrapyards illegali jitnaddfu. Sar xogħol fuq mogħdijiet fil-kampanja u tħawlu siġar u pjanti madwar il-gżira. Tnieda l-prodott turistiku ‘Island of Gozo Country Walks Project’ fejn ġew individwalizzati rotot għal mixjiet fil-kampanja – prodott li issa ser jiġi promoss f’fieri turistiċi internazzjonali.

Sar xogħol infrastrutturali fil-Biċċerija, fil-Pitkalija u f’għadd ta’ toroq li jwasslu għall-irziezet. Inbnew slipways u winches madwar il-gżira. F’dawn l-aħħar 4 snin, ingħatat għajnuna finanzjarja diretta ta’ iktar minn Lm91,000 lill-bdiewa u s-sajjieda Għawdxin.

Qasam Soċjali
Minbarra s-servizzi soċjali li jingħataw b’mod regolari, infetaħ day centre għall-anzjani Għawdxin. Dan id-day centre huwa proġett bi sħab bejn il-Gvern, il-Kurja Veskovili u tnax-il Kunsill Lokali. Infetaħ ukoll l-ewwel ċentru għal organizzazzjonijiet mhux governattivi (NGO Centre), biex ikun ta’ ghajnuna għall-għaqdiet volontarji Għawdxin fil-ħidma tagħhom. Ingħataw madwar Lm50,000 f’inċentivi lil NGOs Għawdxin.

Xogħol f’Għawdex għall-Għawdxin
Inħolqu opportunitajiet ta’ xogħol għall-Għawdxin f’Għawdex stess. Il-ħidma amministrattiva tal-Gvern tal-ufficcju tas-salarji fid-Dipartiment ta’ l-Edukazzjoni u dak relatat mad-Dipartiment tas-Sigurta’ Socjali illum isir kollu f’Għawdex. S’issa inġiebu jaħdmu Għawdex total ta’ 39 ħaddiema Ghawdxin. Bħalissa qiegħda issir ħidma intensiva sabiex jiġi trasferit ix-xogħol tal-Uffiċċju tas-Salarji tal-Ministeru għar-Riżorsi u Infrastruttura u tar-Reġistru Pubbliku.

Jingħataw għadd ta’ inċentivi lill-industrija taħt il-Business Promotion Act sabiex jiġu koperti l-ispejjeż addizzjonali li tiffaċċja l-industrija Għawdxija. Matul dawn l-aħħar 4 snin, ingħataw madwar Lm272,000.