Il-Prim Ministru jħalli Malta għal żjara fl-Awstralja u New Zealand - 7/8/02

Huwa u jkellem lil ġurnalisti fl-Ajruport Internazzjonali qabel ħalla Malta, il-Prim Ministru Dr. Eddie Fenech Adami qal li kif kulħadd jaf, ftit xhur ilu kellu laqgħa fl-Awstralja u f’dik l-okkażjoni kellu l-opportunità li jiltaqa’ kemm mal-Prim Ministru John Howard ta’ l-Awstralja, kif ukoll mal-Prim Ministru Helen Clark ta’ New Zealand. Huwa żied li f’dik l-okkażjoni kien tkellem dwar Malta u r-relazzjonijiet taż-żewġ pajjiżi, partikolarment dwar il-Maltin ta’ barra li jgħixu hemm. Eventwalment huwa kellu stedina biex iżur kemm l-Awstralja u kif ukoll in-New Zealand. 

Dr Fenech Adami qal illi ser jibda’ billi jmur l-Awstralja, fejn l-ewwel parti taż-żjara tiegħu se tkun tikkonsisti f’laqgħat mal-Kommunità Maltija illi kulħadd jaf kemm hi kbira numerikament u imxerrda ma’ l-Awstralja kollha. Għal raġunijiet ta’ żmien, mhux ser ikun possibbli li jmur fl-istati kollha ta’ l-Awstralja, imma se jżur l-iStati prinċipali fejn hemm l-aktar Maltin.

Il-Prim Ministru semma li filwaqt li dari konna nirreferu għalihom bhala ‘emigranti’, illum kulħadd jifhem illi l-Maltin ta’ barra ngħataw l-opportunità li jekk iridu jżommu ċ-cittadinanza Maltija jew doppja. Bħala ċittadini Maltin huma ċertament jibqgħu b’kull interess li jkunu jafu l-iżviluppi f’pajjiżna, x’qed jiġri, x’inhi s-sitważżjoni politika, ekonomika u soċjali ta’ pajjiżna. Għalhekk hija opportunità tajba illi l-Prim Ministru Malti jiltaqa’ mal-kommunità Maltija kemm fl-Awstralja kif ukoll fi New Zealand. 

Dr Fenech Adami qal li se jkollu ukoll laqgħat mal-Prim Ministri ta’ l-Awstralja u n-New Zealand rispettivament, kif ukoll ma diversi personalitajiet oħra. Fl-aħħarnett il-Prim Ministru rringrazzja l-Gvern Awstraljan għall-opportunità li qed tingħata biex iżur l-Awstralja kif ukoll biex ikollu laqgħat uffiċjali hemmhekk.